Manala ny finoanoam-poana momba ny fadimbolana
Fahiny dia zava-miafina ny fadimbolana. Izany no nahatonga ny fiforonan’ny angano maro noforonina talohan'ny nahitana ny fanazavana biolojika.
Andeha hodinihintsika ny sasany amin'izy ireo:
HEVI-DISO 1: Tsy madio, maloto ary voaozona ny ankizivavy mandritra ny fadimbolana
Tsy fahalotoana velively ny fadimbolana na fandehanan’ny fotoana, ary tsy famantarana ozona akory ny fandehanan-dra. Dingana ara-batana tena ilaina izy io ary ny ranon-javatra mivoaka avy ao dia fifangaroan-drà sy tamban-tsela tsy mampidi-doza.
HEVI-DISO 2: Tsy tokony hisasa ny tovovavy mandritra ny fadimbolana.
Diso. Ny fisasàna na ny fandroana, na ny fanovana ny fitaovana fidiovana ara-pahasalamana (ohatra, ny lamba fampiasa amin’ny fadimbolana na ny tampon) ary ny fampiasana kilaoty madio dia singa tena ilaina amin'ny fahadiovana tsara mandritra ny fadimbolana.
HEVI-DISO 3: Marary noho ny fahaverezan-dra “be” ny ankizivavy mandritra ny fadimbolana.
Tsy tokony ho be loatra ny fahaverezan-dra ka mahatonga tsy fahampian'ny vy. Karakarao ny tenanao ary manatona dokotera raha manana fanahiana ianao.
HEVI-DISO 4: Tsy METY HO bevohoka ny tovovavy rehefa tonga fotoana.
Diso izany. Mety ho bevohoka ny tovovavy raha manao firaisana ara-nofo, na dia mandritra ny fadimbolana aza.
HEVI-DISO 5: Tsy tokony handeha hianatra, hivavaka, na hiaraka amin’ny ankizilahy ny ankizivavy rehefa tonga fotoana.
Tsy izany no izy. Tokony hanohy ny fiainanao ara-dalàna ianao, raha mbola salama tsara. Ilaina fotsiny ny mitondra fitaovana fidiovana ara-pahasalamana sy fanovana azy ireny tsy tapaka.
HEVI-DISO 6: Ireo fitaovana ara-pahasalamana ho an'ny fadimbolana dia miteraka tsy fiterahana
Diso. Ireo vokatra ara-pahasalamana dia azo antoka ary matetika no ilaina mba ho maina sy madio hatrany.
HEVI-DISO 7: Rehefa tonga fotoana aloha ny ankizivavy (10 taona eo ho eo), dia midika izany fa nanao firaisana izy ireo
Diso izany. Ny vatana rehetra dia samy hafa ary misy ny sokajin-taona hipoiran’ny fadimbolana. Mety ho tonga fotoana ianao aorian'ny faha-10 taonanao ka hatramin'ny faran'ny fahamaotiana, manodidina ny 15 taona.